आइए कुर्मांचल अखबार के साथ पढ़ते हैं प्रकाश पांडे की स्वरचित कविता….. “हमुकैं खबरै न्हैति”

🌳🙏 हमुकैं खबरै न्हैति✍️🌲

ऐगो हर्यावोक त्यार,करि ल्हियो लगड़ तैयार,
फिर झन कैया हमुंकैं खबरै नि हैई !!फिर झन ०!!
हाताक चुड़ी गावौक गलोबंद,
मैत हुणि बटी रईं भौजी और नंद,
टांगि है द्वीनूं लै कानि में बैग,
धरनी ठुलठुल यों लप्पैक !फिर झन०!!
सुख्यार रैया भुला तुम खुशी रैयै भुली,
हंसनै खेलनै रैया उमर हैजौ ठूली,
दीणईं इज बाबु यो अशीक,
च्येली आ भैट हो म्यार नजीक ! फिर झन०!!
धिनाई मिनाई हैरै ब्यै रोछ गोरू,
भोलै जानूं झन कैयै जाली पोर नेरहूं ,
खेजा चेला दूद और खीर,
सौरसिन हुंणि ल्ही जाली पनीर !फिर झन०!!
काकड़ाक फुल्यूड़ ल्ही जाली गदुवाक टुक,
पापड़ाक नौव चै ल्यूनूं मर्चाका खुन,
थरि है त्वे हुणि भलि भलि साड़ि,
तेरी द्वी बाजी आली वे गाड़ि ! फिर झन ०!!
फड़ुवा गैंडी थामो सब हाथूं में आपणा,
ठुलठुला डाव लगाओ गाड़ा भिड़ां पना,
है जाल पर्यावरण लै साफ,
नि होल मन में क्वे लै संताप ! फिर झन ०!!
लोकपर्व हर्यावकि भौत भौत बधै
🙏 प्रकाश पाण्डेय ✍️
कनखल (हरद्वार)